பெண்கள் பாதுகாப்பை வலுப்படுத்தும் "சிங்கப்பெண்" சிறப்பு அதிரடிப்படை இன்று தொடக்கம் :

தமிழகத்தில் பெண்கள் மற்றும் குழந்தைகளின் பாதுகாப்பை மேலும் வலுப்படுத்தும் நோக்கில், "சிங்கப்பெண்" சிறப்பு அதிரடிப்படையை முதலமைச்சர் சி. ஜோசப் விஜய் இன்று சென்னையில் தொடங்கி வைக்க உள்ளார். இந்த சிறப்பு காவல் அமைப்பு பெண்களுக்கு எதிரான குற்றங்களை தடுப்பதற்கும், அவசர சூழ்நிலைகளில் விரைவாக நடவடிக்கை எடுப்பதற்கும் உருவாக்கப்பட்டுள்ளது. சென்னை எழும்பூரில் உள்ள ராஜரத்தினம் விளையாட்டு அரங்கில் நடைபெறும் நிகழ்ச்சியில் முதலமைச்சர் விஜய் இந்த புதிய படையை அதிகாரப்பூர்வமாக அறிமுகப்படுத்த உள்ளார். கடந்த மாதம் தொடங்க திட்டமிடப்பட்டிருந்த இந்த திட்டம் நிர்வாக காரணங்களால் ஒத்திவைக்கப்பட்ட நிலையில், தற்போது முழுமையான ஏற்பாடுகளுடன் தொடங்கப்பட உள்ளது. இந்த சிறப்பு படை நேரடியாக முதலமைச்சரின் மேற்பார்வையில் செயல்படும் என்று அரசாணையில் குறிப்பிடப்பட்டுள்ளது. பெண்கள் அதிகமாக பயன்படுத்தும் பேருந்து நிலையங்கள், ரயில் நிலையங்கள், கல்வி நிறுவனங்கள், ஐ.டி. நிறுவனங்கள் மற்றும் மக்கள் அதிகம் கூடும் பகுதிகளில் இந்த படையினர் கண்காணிப்பு மற்றும் பாதுகாப்பு பணிகளை மேற்கொள்வார்கள். சிங்கப்பெண் சிறப்பு அதிரடிப்படையின் முதல் கட்டத்தில் காவல்துறை உயர் அதிகாரிகள், ஆய்வாளர்கள், துணை ஆய்வாளர்கள் மற்றும் பிற காவலர்கள் உள்ளிட்ட பலர் நியமிக்கப்பட்டுள்ளனர். பெண்கள் பாதுகாப்பு தொடர்பான புகார்களுக்கு உடனடி நடவடிக்கை எடுப்பது, பாதிக்கப்பட்டவர்களுக்கு உதவுவது மற்றும் குற்றங்களை முன்கூட்டியே தடுக்க நடவடிக்கை எடுப்பது ஆகியவை இந்த படையின் முக்கிய பணிகளாக இருக்கும். பெண்கள் பாதுகாப்பு அரசின் முக்கிய முன்னுரிமைகளில் ஒன்றாக இருப்பதாகவும், தமிழகத்தின் அனைத்து மாவட்டங்களிலும் பாதுகாப்பான சூழலை உருவாக்க இந்த திட்டம் உதவும் என்றும் அதிகாரிகள் தெரிவித்துள்ளனர். 📻 KAVIN RADIO 24/7 🌐 www.kavinradio.in